ကျွန်တော်က အချစ်ရေးနဲ့ ပတ်သက်ရင် ကံတော်တော်ဆိုးတယ်။
နှလုံးလမ်းကြောင်းမှာ ကျွန်းခံသလား ဘာလားတော့မသိပါဘူး။
ထားဖူးတဲ့ ရည်းစားအရေအတွက်ကို လက်ချိုးရေကြည့်ရင် လက်နှစ်ဖက်သုံးရမယ်။ လုံးဝမထင်ရဘူး။ (ရယ်ပါ)
ကျွန်တော့်ကို ထားသွားကြတာများပါတယ်။
ကျွန်တော့်မှာ ခဏခဏ အသည်းကွဲရတယ်။ (ပြုံးပါ)
အသည်းကွဲတဲ့ဒဏ်ရာကို ကုစားဖို့ နည်းလမ်းတွေ ရှာရ ကြံရဖူးတာပေါ့။
ခဏခဏအသည်းကွဲဖူးတော့လည်း ခံနိုင်ရည်ပိုရှိလာတာပေါ့။
ယောက်ျားလေး အတော်များများကတော့ အသည်းကွဲရင် အရက်သောက်ကြတယ်။
အသည်းကွဲဒဏ်ရာ သက်သာသလား မသက်သားဘူးလားေတော့မသိ၊
ကျွန်တော်ကတော့ အရက်ကြိုက်တဲ့သူလည်း မဟုတ်လေတော့ အရက်တော့မသောက်ချင်ဘူး။
ခဏခဏ ထားခဲ့တာခံရတော့ ကျွန်တော်စဉ်းစားတယ်။ ကျွန်တော်များ တစ်ခုခုမှားနေသလား။
ဘာများလိုနေသလဲ။ မိန်းကလေးတွေ မကြိုက်တဲ့အချက် ဘာတွေများ လုပ်မိနေသလဲ။ သလဲ သလဲ သလဲ နဲ့ပေါ့။
စဉ်းစားရင်း စဉ်းစားရင်း ... စဉ်းစားရင်း စဉ်းစားရင်း နဲ့ပဲ စိတ်အားတွေငယ်၊ စိတ်ဓာတ်တွေကျ နဲ့တောင် ဖြစ်မိတယ်။ (ရယ်ပါ)
သူငယ်ချင်းတွေကတော့ အားပေးပါတယ်။ အားပေးစကားတွေ ကြားလိုက်ရပြန်တော့လည်း ကျွန်တော့်မှာ ချို့ယွင်းချက်မရှိသလိုမျိုးပဲ။
အားပေးကြတယ်ဆိုတော့လည်း ဒီလိုမျိုးပဲပြောမှာပေါ့လေ။ အင်း ... ကျွန်တော်ဟာ ကျိန်စာသင့်နေသူတစ်ယောက်ပဲဖြစ်ရမယ်။
ဘဝဆက်တိုင်း ဆက်တိုင်း အကြိမ်တစ်ရာ အသည်းကွဲစေ ဆိုတဲ့ ကျိန်စာမျိုးများဖြစ်နေလေမလား။
ဟီးဟီး။ စိတ်ကူးယဉ်ကြည့်တာ။ (ခစ်ခစ် ခစ်ခစ် မြည်အောင် ရယ်ပါ)
တစ်ခါတစ်လေကျတော့ အသည်းအခွဲခံရတဲ့ အရသာကိုကြိုက်သလိုလိုပဲ။ ထူးဆန်းနေလေရော့သလား။
ကျွန်တော်ကတော့ မထူးဆန်းဘူးလို့ထင်ပါတယ်။ အဲလက်(စ်) သီချင်းထဲမှာတောင်ပါသေးတယ် ~~ အသည်းကွဲတဲ့ အရသာကို ကြိုက်မိလို့ ~~ ဆိုတာ။
အသည်းကွဲဖြေဆေး အတွက် ပထမဆုံး ဆေးက အသည်းကွဲတဲ့ အရသာကို ကြိုက်တတ်ရမယ်။
နောက်တစ်ချက်ကတော့ စိတ်ပြေလက်ပျောက် တစ်ခုခုလုပ်ရမယ်။ သူငယ်ချင်းတစ်ယောက်ကတော့ သူစိတ်ညစ်ရင် ဂိမ်းကစားတယ်တဲ့။ ဂိမ်းထဲမှာအာရုံရောက်နေရင် ကျန်တာတွေမေ့ပြီပေါ့။
ကျွန်တော်ကတော့ နောက်ဆုံးတစ်ခေါက် အသည်းကွဲတော့ ဗွီဒီယိုတွေကြည့်တယ်။ 500 Days of Summer ကားကို အကြိုက်ဆုံးပဲ။
နောက်ဆုံးအခန်းကို အကြိုက်ဆုံးပဲ။ အဲဒီကားကလည်း အသည်းကွဲတဲ့သူတွေ ကြည့်ဖို့ သင့်တော်သလားလို့။ အဓိကကတော့ နောက်ဆုံးခန်း။
သေချာတာကတော့ အကြိုက်ချင်းကတော့ တစ်ယောက်နဲ့ တစ်ယောက်တူမှာ မဟုတ်ပါဘူး။ အဲဒီတော့ ကိုယ်ဝါသနာပါတာ တစ်ခုခုလုပ်ပါပေါ့။
နောက်တစ်ချက်ကတော့ သူငယ်ချင်းတွေနဲ့ လျှောက်လည်ပါ။
မျိုးကြီး ကတော့ ~~ အဖော်တွေကောင်းပေမယ့်လည်း ခဏလေး စိတ်ဖြေယုံပဲရှိ ~~ ဆိုလားလို့။ ခဏလေး ဆိုလည်း ခဏလေး စိတ်ဖြေနိုင်ရင် မနည်းပါဘူး။
တစ်ခုရှိတာက ပျော်ပျော်နေတတ်တဲ့ သူငယ်ချင်းမျိုးဖြစ်ဖို့လိုတယ်နော်။ ပျော်ပျော်နေတတ်တယ်ဆိုတာ ကျွန်တော့်လို သူငယ်ချင်းမျိုးပေါ့။ (နှုတ်ခမ်းတွန့်ရုံလေး ပြုံးပါ)
ဆိုပါတော့ တစ်ချို့တွေက ရှိတတ်တယ်။ သူ့တို့ဆီရောက်တာနဲ့ စိတ်ညစ်စရာတွေ စပြောတော့တာပဲ။ သူအဆင်မပြေတာတွေ။ သူ့ပြသနာတွေနဲ့။
ကိုယ်က အသည်းကွဲလို့ သူဆီသွားတယ်။ သူဆီရောက်မှ ပိုဆိုးသွားမယ်။ အဲဒါကြောင့် ပျော်ပျော်နေတတ်တဲ့ သူငယ်ချင်းဆီသွားပါလို့ပြောတာ။ ကျွန်တော့်ဆီ လာခဲ့လည်းရပါတယ်။ အသည်းကွဲတဲ့ အကြောင်းတွေ ပြောပြမယ်။ အသည်းကွဲတာကို ကူပြီး ခံစားပေးမယ်။ ကော်ဖီလိုက်တိုက်မယ်။
ပြီးရင် အသည်းဘယ်လိုကွဲသလဲ ဘယ်လိုခံစားရသလဲ ဆိုတာကို မသိမသာ analyse လုပ်မယ်။ အဲလို အသည်းကွဲတဲ့သူတွေကို analyse လုပ်ခဲ့တဲ့ အတွေ့အကြုံလည်းရှိလို့လည်း ဒီ post လေးရေးနိုင်တာပဲ။ (ခွက်ထိုးခွက်လန် ရယ်ပါ)
အလွန်ခိုင်မာတဲ့ source တွေဖြစ်တဲ့ Facebook Notes တို့ Forward Mail တို့အရပေါ့လေ။
ဆိုကရေးတီး ရဲ့ အတွေးအခေါ်က ဒီလိုပါတဲ့ခင်ဗျ။
ကိုယ့်ကိုထားသွားတဲ့သူဟာ သူ့ကိုချစ်တဲ့ သူတစ်ယောက်ဆုံးရှုံးသွားတယ်တဲ့။ ကိုယ်ကတော့ ကိုယ်ကိုမချစ်တဲ့သူကိုပဲ ဆုံးရှုံးရတာတဲ့။
အဲဒီတော့ ကိုယ်ကိုထားခဲ့တဲ့သူကို သနားရမယ်။ နောက်တစ်ချက်က သူဟာ ကိုယ့်နဲ့မတန်တာ၊ ကိုယ့်အချစ်နဲ့ မထိုက်တန်တာလို့ မှတ်ရမယ်။
ကျွန်တော်ကတော့ ဆိုကရေးတီးရဲ့ နည်းကို မကြိုက်ပါဘူး။ သူပြောသလို ကိုယ်နဲ့ မတန်ဘူးတို့၊ ကိုယ်အချစ်နဲ့ မတန်ဘူးတို့ ဘယ်လိုမှ မှတ်ပေးလို့မရဘူး။
ချစ်မိတယ်ဆိုကတည်းက တန်တယ်တွေ မတန်ဘူးတွေ မပါတော့ဘူး။ ရှုံးတယ်တွေ နိုင်တယ်တွေလည်း မပါတော့ဘူး။
ဆိုကရေးတီးနည်းနဲ့ အဆင်ပြေမယ်ဆိုရင်လည်း ပြေသလို ကြည့်ကြက်ပြီးဖြေလိုက်ပေါ့လေ။
နောက်ဆုံး တစ်ချက်ကတော့ ကိုယ့်ကို အသည်းခွဲပြီးထားခဲ့တဲ့သူတွေ မမုန်းလိုက်ရဘူး။
အဲဒါ အရေးအကြီးဆုံးလို့ထင်တာပဲ။ မုန်းလိုက်ရင် ပိုခံရတယ်။ အမုန်းက လူကိုပူလောင်စေတာကိုး။
ကိုယ့်အသည်းကိုခွဲသွားတဲ့ သူကို တတ်နိုင်သလောက် ဆက်ပြီးချစ်နေရမယ်။
အချိန်က အဆုံးအဖြတ်ပေးသွားပါလိမ့်မယ် ဆိုတာမျိုးပြောတတ်ကြတယ်။ အချိန််ဆိုတာ တရားသူကြီးပေါ့။
အခုလို အသည်းကွဲတဲ့ အခါကျပြန်တော့ အချိန်ဆိုတာ အကောင်းဆုံးသမားတော်လည်း ဖြစ်နေပြန်ရော။
ဒါမှမဟုတ်လည်း အကောင်းဆုံးဆေးပေါ့။ အပေါ်ကပြောခဲ့တဲ့ အချက်တွေအတိုင်းသာ မှန်မှန်လုပ်။
အချိန်က အကောင်းဆုံးကုပေးသွားလိမ့်မယ်။ ဟဲဟဲ ... ပြောရရင် ကိုယ်တွေ့ပါ။
ဆောင်းကုန်တော့ နွေကို ရောက်သွားတာပေါ့လေ။ (မအူမလည် ပြုံးပါ)
ဒီ blog post လေးအတွက် ကျေးဇူးတင်ထိုက်တဲ့သူများကတော့ ကျွန်တော့်အသည်းကို ခွဲခဲ့ကြသူများပါပဲ။
ကျေးဇူးအများကြီးတင်ပါတယ်။
(မချိတင်ကဲ ပြုံးပါ)
