သစ္စာ

သစ္စာ

အသက်ကဖြင့် မြေးချီလို့ရတဲ့အရွယ်ရောက်နေပြီ ကလေးကလားတွေ ရေးနေသေးတယ်လို့ ပြောလည်းခံရမှာပဲ။ စဆရက လုပ်ပြီး ကိုယ်ရည်သွေးနေတယ်ပြောလည်း ခံရမှာပဲ။ အသလွတ်ကြီးတွေ လာကြွယ်နေတယ်ဆိုလည်း ခံရမှာပဲ။ စိတ်ထဲမှာ ကလိကလိဖြစ်နေပြီး ရေးချင်လွန်းလို့ ဘယ်သူဘာပြောပြော ဘယ်သူဘာထင်ထင် ကိုယ်ရေးချင်တာ ရေးတယ်ကွာလို့  မိုက်စိတ်မွေးပြီးရေးလိုက်တယ်။

ပြောချင်တာက ကျွန်တော်မှာ လက်ချိုးရေရင် လက်နှစ်ဖက်သုံးရမယ့် အရေအတွက်လောက် ရည်းစားတွေရှိခဲ့ဖူးတယ်။ ဒါပေမယ့် ဘယ်ရည်းစားကိုမှ သစ္စာမဖောက်ခဲ့ဖူးဘူး။ ရှင်းရှင်းပြောရရင် တပြိုင်တည်း ရည်းစားနှစ်ယောက်မထားခဲ့ဖူးဘူး။ ရည်းစားရှိရဲ့နဲ့ နောက်တစ်ယောက်ကို အီစီကလီလုပ်ဖို့ဆိုတာမျိုးကတော့ ဝေးသေး။ အိုကေ နင်နဲ့ငါနဲ့ပြတ်ပြီ ဆိုပြီးမှ နောက်တစ်ယောက်တွေ့ဖို့ ဖြစ်လာတာချည်းပါ။ နောက်တစ်ယောက်တွေ့ထားလို့ ဒီတစ်ယောက်ကိုဖြတ်တယ်ဆိုတာမျိုးလည်း နတ္ထိ။ သစ္စာမဖောက်ဘူးဆိုတာ အဲဒါကိုပြောချင်တာပါ။

တစ်ယောက်နဲ့ တစ်ယောက်ချစ်ကြပြီ ကြိုက်ကြပြီဆိုရင်၊ အဓိကအကျဆုံးအချက်က သစ္စာရှိဖို့ပဲ။ တခြားအချက်တွေ အားလုံးရဲ့ရှေ့မှာဒီအချက်ရှိရမယ်။ အဲဒါ ကျွန်တော့ခံယူချက်။ ဒါပေမယ့် ရည်းစား ၁၀ ယောက်လောက် တပြိုင်နက်တည်း ထားတဲ့သူတွေကိုလည်း အပြစ်မပြောလိုပါဘူး။ ဘာလို့လည်းဆိုတော့ သူတို့ရဲ့လူပီသတဲ့ ပင်ကိုသဘာဝ အားကောင်းလို့ပဲလို့တွေးပါတယ်။  လူ့ပင်ကိုသဘာဝအရ လူတွေဟာ အဖော်/မိန်းမ/ယောက်ျား တစ်ယောက်ထက်ပိုလိုချင်စိတ် ရှိကြတယ်လို့ဖတ်ဖူးတယ်။ (နှာဘူးတွေ ဒီအချက်ကိုကိုးကားပြီး ဘူးသထက်ဘူးမှာတော့စိုးရတယ်။ ခွိခွိ။) အဲဒီတော့ ဘယ်လိုပဲဖြစ်ဖြစ် ကိုယ်ရောက်နေတဲ့ ပတ်ဝန်းကျင်၊ ယဉ်ကျေးမှု၊ လူမှုစည်းကမ်း ဆိုတာတွေနဲ့ ကိုယ့်ဘာသာထိမ်းရမျိုးမဟုတ်လား။

အခုတလော သစ္စာမဲ့ချက် ဖောက်ပြန်ချက်တွေ တွေ့တွေ့နေရတာ မြင်လို့တောင်မကောင်းဘူး။ ကိုယ်ကသစ္စာရှိပါတယ်လို့ ပြောရင်တောင် ဟုတ်လို့လား ဆိုပြီးမယုံ သင်္ကာဖြစ်ဦးမှာ။ ကျွန်တော်ကတော့ သစ္စာဆိုပြလို့ရတယ်။ ကျွန်တော် တီဇက်ကေသည် ကျွန်တော့်ရည်းစားအပေါ်တွင် သစ္စာရှိခဲ့ပါသည်၊ ဤမှန်သော သစ္စာစကားကြောင့် ကမ္ဘာကြီးနောက်ပြန်လည်ပါစေ၊ ဆိုပြီး သစ္စာဆိုပစ်လိုက်လို့ ကမ္ဘာကြီးနောက်ပြန်လည်ပြီး အနောက်ဖက်က နေထွက်သွားမယ်။ ဟွန်း။ မလုပ်ချင်လို့ကြည့်နေတာ။

နောက်များ ချစ်သူတစ်ယောက်ထပ်တွေ့ခဲ့မယ်ဆိုရင် (လောလောဆယ်တော့ စိတ်ကုန်နေတယ်) သစ္စာရှိတဲ့သူမျိုးပဲတွေ့ချင်ပါတယ်။ ဒါမှ ကျွန်တော်က သစ္စာဆိုပြီးတော့ ကမ္ဘာကြီးကိုနောက်ပြန်လှည့်၊ အဲဒီတော့ ကျွန်တော့်ချစ်သူက လူတွေဒုက္ခမရောက်ရအောင် ကျွန်တော့်လိုပဲသစ္စာဆိုပြီးတော့ ပုံမှန်အတိုင်းလည်အောင် ပြန်လှည့်။ အရှေ့ကနေထွက် ပန်းရောင်စုံတွေပွင့် အနောက်ဖက်မှာနေဝင် ငှက်ကလေးတွေအိပ်တန်းပြန် ပင်လယ်လှိုင်းတွေ စည်းချက်မှန်မှန်ပြန်ရိုက်ခတ် ကမ္ဘာလောကကြီးတစ်ခုလုံးသာယာ။ ဘယ်လောက် ကြည်နူးစရာကောင်းလိုက်မလဲ။ ခွိခွိခွိ။

တီဇက်ကေ
11-Dec-2016

ဒီနေ့ ၃ ခါပျော်ရပြီးပြီ

ဒီနေ့ ၃ ခါပျော်ရပြီးပြီ

မြန်မာ့လက်ရွေးစင် ဘောလုံးအသင်းကို မော်ရင်ညို(Mourinho)တို့ ဂွာဒီအိုလာ(Guardiola)တို့ ဂျိုအာချင်လိုး(Joachim Löw)တို့ကို တစ်လလောက်ပေးကိုင်ခိုင်းလိုက်ရုံနဲ့ ကမ္ဘာ့ဖလားခြေစစ်ပွဲ အောင်ဖို့ဆိုတာမျိုးက ဘယ်လိုမှမဖြစ်နိုင်ဘူး။ ကမ္ဘာ့ဖလားရဖို့ဆိုတာ စိတ်တောင်မကူးနဲ့။ ကစားသမားတွေရဲ့ ခန္ဓာကိုယ်ကြံ့ခိုင်မှုတွေ နည်းစနစ်ကျွမ်းကျင်မှုတွေက ကမ္ဘာ့အဆင့်မှမရှိတာ။ နည်းပြတွေက တော်လွန်းနေတယ်ပဲထား ကစားသမားတွေကမလိုက်နိုင်တော့ ဘယ်လိုမှမဖြစ်နိုင်တာ။

အဲဒီတော့ ကစားပွဲမှာ မြန်မာအသင်းရှုံးပြီဆိုပါတော့။ ပရိတ်သတ်တွေက ဝေဖန်တာတွေ အပြစ်တင်တာတွေလုပ်ကြမယ်။ ဒါလည်း သဘာဝပဲမို့ လွတ်လွတ်လပ်လပ်ဝေဖန် လွတ်လွတ်လပ်လပ် အပြစ်တင်။ ကိစ္စမရှိဘူး။ ဒါပေ့မယ့် ကမ္ဘာ့အဆင့်ရှိကြောင်း တခြားအသင်းတွေနဲ့ သက်သေပြခဲ့ပြီးသား နည်းပြကို နင်းကန်လှိမ့်ပိမ့် အပြစ်တင်နေမယ်ဆိုရင်တော့ သိပ်ပြီးတော့ မဆီလျော်လှဘူး။ မြန်မာအသင်း ကမ္ဘာ့ဖလားဝင်ကန်နိုင်ဖို့ဆိုတာ ဘယ်နည်းနဲ့မှ တစ်လ တစ်နှစ် ရေတိုစီမံချက်လေးတွေနဲ့ လုပ်လို့မရဘူး။ ဟုတ်တယ်မှတ်လား။

အမ်း... ဒီလိုပဲ အန်အယ်ဒီအစိုးရကို တစ်လလောက်ပေးအုပ်ချုပ်ခိုင်းလိုက်ရုံနဲ့လည်း တစ်နိုင်ငံလုံး ၂၄နာရီ လျှပ်စစ်မီးမပျက်ပဲ အချိန်ပြည့် ရဖို့ဆိုတာမဖြစ်နိုင်ဘူး။ အန်အယ်ဒီအစိုးရရဲ့ အရည်အချင်းက ဘယ်လောက်ရှိတယ်ဆိုတာ သက်သေတော့ မပြရသေးဘူးပေါ့။ ဒါပေမယ့် အိုဘားမားအစိုးရအဖွဲ့ မြန်မာပြည်ခေါ်ပြီးလုပ်ခိုင်းရင်လည်း တစ်လအတွင်း လျှပ်စစ်မီးမှန်အောင်လုပ်ဖို့ဆိုတာ မဖြစ်နိုင်ဘူး။ တစ်နိုင်ငံလုံးမှာ လုပ်စရာအလုပ်ကလည်း လျှပ်စစ်မီးမှန်အောင်လုပ်ဖို့ တစ်မျိုးတည်းရှိတာဆိုရင်တော့ တစ်မျိုးပေါ့။

ဟုတ်ကဲ့ ပြောချင်တာက အခုမှရောက်တယ်။ မီးပျက်လို့ အပြစ်တင်ကြ ဝေဖန်ကြ လုပ်တဲ့အခါ အန်အယ်ဒီအစိုးရလည်း အလကားပဲ အသုံးမကျပါဘူးကွာလို့ ဝေဖန်ရင်တော့ ဉာဏ်နည်းလွန်းရာကျမယ်။ ဒါမှမဟုတ် ဒီလိုကိစ္စမျိုးမှာ ဦးနှောက်က မသန်မစွမ်းဖြစ်နေတာ ဖြစ်ရင်လည်းဖြစ်မယ်။ အဲဒါကြောင့် မြန်မာဘောလုံးအသင်းနဲ့ နည်းပြ ဥပမာပေးထားတာ။ ဆိုက်ကားဆရာကနေ ဝန်ကြီးအဆင့်အထိ မြန်မာပြည်မှာ ဘောလုံး ဗဟုသုတ/အတွေးအခေါ်နဲ့ ပက်သက်ရင် အများစုက ဦးနှောက်တွေသန်စွမ်းကြတာကိုး။

အဲဒီ့ အန်အယ်ဒီအစိုးရကို လျှပ်စစ်မီးမမှန်လို့ အပြစ်တင်၊ ဝေဖန်၊ ခနိုးခနဲ့ ရိရွဲ့စောင်းမြောင်းနေတဲ့သူတွေဟာ မြန်မာဘောလုံးအသင်းမှာ(ဒါမှမဟုတ် ကိုယ်အားပေးတဲ့ ကလပ်အသင်းတစ်သင်းသင်းမှာ) ငါသာနည်းပြဖြစ်ရင် ဘယ်လိုနည်းပြလုပ်မယ် ဘယ်လိုကန်ခိုင်းလိုက်မယ်ဆိုတာ စိတ်ကူးယဉ်ဖူးမှာဖြစ်ပေမယ့်၊ အဲဒီ့လူတွေဟာ ငါသာအစိုးရဖြစ်ရင်/လျှပ်စစ်ဝန်ကြီးဖြစ်ရင် မီးမှန်အောင်ဘယ်လိုလုပ်မလဲ မတွေးမိကြဘူးလားလို့ ထင်မိတယ်။

အဲဒီ့လူတွေအတွက် ဒီလိုပဲဖြည့်တွေးလိုက်ပါတယ်။ ဦးသိန်းစိန်အစိုးရ အဖွဲ့ဝင်တွေ၊ ဦးသိန်းစိန်အစိုးရကို အားပေးခဲ့သူတွေဟာ အရင်တုန်းကတော့ အစိုးရဘက်က ကာကွယ်ဖာထေး ခုခံခေျပပြီးနေလာရတာဆိုတော့၊ အခုမှ ကဲငါ့တို့အလှည့်ရောက်ပြီကွဆိုပြီး တစ်ရက် ဆယ်ခါလောက် မီးပျက်တဲ့အကြောင်း ထထအော်ပြီး စိတ်ကျေနပ်မှုရှာကြတာနေမှာပဲ ဆိုပြီးပေါ့။

အပြစ်တင်ဝေဖန်တဲ့သူတွေထဲမှာ နောက်အုပ်စုတစ်မျိုးလည်းရှိသေးတယ်။ ဦးသိန်းစိန်အစိုးကိုလည်း မကြိုက်ခဲ့ဖူး၊ အန်အယ်ဒီကိုလည်း ကြိတ်ပြီးတော့အမြင်ကတ်တယ်။ အဲဒီ့အုပ်စုကိုတော့ လွတ်လပ်စွာ ဝေဖန်ပါ။ ဦးနှောက်လေးတော့ သုံးပါဦးလို့ ပြောချင်ပါတယ်။

အန်အယ်ဒီအားပေးတဲ့ လူတချို့လည်း မီးပျက်တဲ့ကိစ္စမှာ အစိုးရကိုအပြစ်ပြောချင်တာ ဝေဖန်ချင်တာ တွေ့တယ်။ အတော်များများကလည်း အီးပီစီ အပေါ်ဒေါသပုံချကြတယ်။
နောက်၂ နှစ် ၃ နှစ်လောက် ဆိုရင်တော့ ဒီလျှပ်စစ်မီးကိစ္စ အန်အယ်ဒီအစိုးရရဲ့ ကိုင်တွယ်ပုံကို
 ချီးကျူးရမလား အပြစ်တင်ရမလား ကွဲကွဲပြားပြားသိလောက်ပြီပေါ့။ ရှေ့လျောက်လည်း ဝေဖန်စရာတွေအများကြီး တွေ့ရဦးမှာလို့ထင်ပါတယ်။ လောလောဆယ်တော့ မြန်မာဘောလုံးအသင်းနဲ့ နည်းပြဥပမာကိုသာ ကိုသာပြေးမြင်လိုက်ကြပါလို့။


- တီဇက်ကေ
4:44 PM 21-May-2016