မြန်မာပြည်၏ အားလပ်ရက်များ

မြန်မာပြည်၏ အားလပ်ရက်များ

ဒီနှစ် မေလ ၁ ရက်နေ့က တနင်္ဂနွေနေ့ ဖြစ်နေတာက စပြီးတော့၊ ပိတ်ရက်တွေ အကြောင်းရေးဖို့ စဉ်းစားမိပါတယ်။ ခေါင်းစဉ်ကို ဘယ်လိုပေးမလဲပေါ့လေ ... စပြီး စဉ်းစားပါတယ်။ အဲဒီ့မှာ အခုတပ်ထားတဲ့ ခေါင်းစဉ်ကိုရွေးမိပါတယ်။ တက္ကသိုလ်ဝင်တန်း စာမေးပွဲရဲ့ စာစီစာကုံးခေါင်းစဉ်လိုလို ဘာလိုလိုနဲ့ပေါ့။

အဲဒီတော့ စာစီစာကုံးပုံစံ ရေးပစ်လိုက်တယ်။ ဘာရမလဲ ... ဟင်းဟင်း ... ၊ ဘာမှမရဘူး။ :P


ကျွန်ုပ်တို့ မြန်မာပြည်သည် အားလပ်ရက် အလွန်များသောနိုင်ငံဖြစ်ပါသည်။ အခြားသောနိုင်ငံများတွင် ကျွနု်ပ်တို့ကဲ့သို့ အားလပ်ရက် များများစားစား ရှိမည်မဟုတ်ဟု ကျွန်ုပ်အပြည့်အဝ ယုံကြည်ပါသည်။ မြန်မာနိုင်ငံ၏ သဘာဝ သယံဇာတ ပေါများကြွယ်ဝမှုမှာ ဂုဏ်ယူဝင့်ကြွားစရာ ကောင်းသကဲ့သို့ အားလပ်ရက် ကြွယ်ဝခြင်းကိုလည်း ဂုဏ်ယူဝင့်ကြွားနိုင်ပါသည်။

အားလက်ရက်များအား ပြက္ခဒိန်၏အစ ဇန်နဝါရီလမှ ဒီဇင်ဘာလအထိ အစဉ်လိုက်ရေတွက်၍ ဖော်ပြသွားပါမည်။ ဇန်နဝါရီလ ၄ ရက်နေ့မှာ လွတ်လပ်ရေးနေ့ဖြစ်ပါသည်။ အချုပ်အခြာအာဏာ လက်လွတ်ဆုံးရှုံးဖူးသော (သို့) သူ့ကျွန်ဘဝသို့ ကျရောက်ဖူးသော နိုင်ငံတိုင်းလိုလိုတွင်
လွတ်လတ်ခြင်း၏ အနှစ်သာရကို သိရှိရန်၊ လွတ်လတ်ခြင်းကို တန်ဖိုးထားတတ်စေရန်၊ လွတ်လတ်ရေးနေ့ကို သတ်မှတ်ထားတတ်ကြပါသည်။

ဖေဖော်ဝါရီလ ၁၂ ရက်နေ့သည် ပြည်ထောင်စုနေ့ဖြစ်ပါသည်။ တိုင်းရင်းသားများ စည်းလုံးညီညွတ်စွာ လွတ်လပ်ရေးအတွက် ဆောက်ရွက်ခဲ့ကြသောနေ့ကို အမှတ်ရစေရန် ပြည်ထောင်စုနေ့အဖြစ် သတ်မှတ်ထားခြင်းမှာ မှန်ကန်လှပေသည်။ မြန်မာနိုင်ငံ၏ လူဦးရေ အများစုမှာ တောင်သူလယ်သမားများ ဖြစ်ကြပါသည်။ ထို့ကြောင့် မတ်လ ၂ ရက်နေ့ကို တောင်သူလယ်သမားနေ့ဟု သတ်မှတ်ထားပါသည်။ တောင်သူလယ်သမားနေ့အပြင် အားလပ်ရက် အဖြစ်သတ်မှတ်ထားသော ရက်တစ်ရက် မတ်လထဲတွင် ရှိပါသေးသည်။ ၄င်းမှာ တပ်မတော်နေ့ ဖြစ်ပါသည်။ တပ်မတော်နေ့၏ ငယ်နာမည်မှာ တော်လှန်ရေးနေ့ဖြစ်ပါသည်။

ဧပြီလ။ မြန်မာရိုးရာပြက္ခဒိန်အရ တန်ခူးလတွင် သင်္ကြန်ပွဲကို ဆင်နွဲကြပါသည်။ အကြိုနေ့၊ အကျနေ့၊ အကြတ်နေ့၊ အတက်နေ့ ဟူ၍ လေးရက်တိုင်တိုင် နိုင်ငံတစ်ဝှမ်း ရေပက်ကစားကြခြင်းဖြစ်ပါသည်။ တစ်ခါတစ်ရံ အကြတ်နေ့ နှစ်ရက်ဖြစ်သည့် နှစ်များလည်းရှိတတ်ပါသည်။ မြန်မာပြက္ခဒိန်နှင့် အပြည်ပြည်ဆိုင်ရာသုံး ပြက္ခဒိန်တို့မှာ စင်ခရိုနိုက် (syncronize) မဖြစ်ကြပါ။ ထို့ကြောင့် ၂၀၀၀ ပြည့်နှစ်နောက်ပိုင်းတွင် မြန်မာပြက္ခဒိန်ဖြင့် ရက်သတ်မှတ်၍ သင်္ကြန်ပွဲတော်ကို မကျင်းပပဲ အပြည်ပြည်ဆိုင်ရာသုံး ပြက္ခဒိန်ဖြင့် ရက်သတ်မှတ်၍ ကျင်းပပါသည်။ ယခင်က သင်္ကြန်ပွဲဆင်နွဲသော ၄ ရက် (သို့) ၅ ရက် ကို အားလပ်ရက် သတ်မှတ်သော်လည်း ယခုအခါ ဧပြီ ၁၂ ရက်မှ ၂၁ ရက်နေ့အထိ (၁၀)ရက်တိတိ ကို အားလပ်ရက်အဖြစ် သတ်မှတ်ပေးထားပါသည်။

မေလ ၁ ရက်နေ့မှာ အပြည်ပြည်ဆိုင်ရာ အလုပ်သမားနေ့ ဖြစ်ပါသည်။ ကမ္ဘာ့နိုင်ငံများတွင်လည်း အားလပ်ရက်ဖြစ်ပါသည်။ ဇူလိုင် ၁၉ ရက်နေ့ကို အာဇာနည်နေ့ အဖြစ်သတ်မှတ်ထားပါသည်။ မြန်မာ့လွတ်လပ်ရေးအတွက် ကြိုးပမ်းခဲ့ကြသော အာဇာနည်ခေါင်းဆောင်ကြီးများ လုပ်ကြံခံရ၍ ကျဆုံးခဲသောနေ့ကို သတ်မှတ်ပေးထားခြင်းဖြစ်ပါသည်။ ထိုနေ့တွင် ဝမ်းနည်းသောအထိမ်းအမှတ် အနေဖြင့် နိုင်ငံတစ်ဝှမ်းတွင် နိုင်ငံတော်အလံကို တိုင်ဝက်သာလွှင့်ထူကြပါသည်။

မြန်မာနိုင်ငံသည် ဗုဒ္ဓဘာသာနိုင်ငံဟု တရားဝင်မသတ်မှတ်ထားသော်လည်း ဗုဒ္ဓဘာသာအများစု နေထိုင်သည့်အတွက် ဗုဒ္ဓဘာသာနှင့်သက်ဆိုင်သော နေ့ထူးနေ့မြတ်များကိုလည်း အားလပ်ရက်အဖြစ် သတ်မှတ်ထားပါသည်။ ထိုနေ့ထူးနေ့မြတ်များမှာ တိုင်ဆိုင်လှစွာပင် လပြည့်နေ့များ၌ ကျရောက်လေ့ရှိပါသည်။ ထို့ကြောင့် မှတ်သားရလွယ်ကူပါသည်။ ထိုနေ့များမှာ ကဆုန်လပြည့်နေ့၊ ဝါဆိုလပြည့်နေ့၊ သီတင်းကျွတ်လပြည့်နေ့၊ တန်ဆောင်မုန်း လပြည့်နေ့၊ တပေါင်းလပြည့်နေတို့ ဖြစ်ကြပါသည်။ လပြည့်နေ့တိုင်း အားလပ်ရက်မဖြစ်သည်မှာ အားမလိုအားမရ ဖြစ်စရာကောင်းပါသည်။

ဩဂုတ်၊ စက်တင်ဘာ၊ အောက်တိုဘာ၊ နိုဝင်ဘာ၊ ဒီဇင်ဘာလများတွင် အားလပ်ရက် သက်မှတ်ချက်သိပ်မရှိလှပါ။ သို့သော် မြန်မာပြက္ခဒိန်အရ သတ်မှတ်လေ့ရှိသော အားလပ်ရက်များသည် ထိုလများတွင်ကျရောက်တတ်ပါသည်။ ထို့ကြောင့် တစ်နှစ်ပတ်လုံး အားလပ်ရက်ဖြင့်လွတ်ကင်းသော လမှာ မရှိသလောက်ရှားပါးသည်။

တန်ဆောင်မုန်း လပြည့်ကျော် ၁၀ ရက်နေ့ကို အမျိုးသားနေ့ဟုသတ်မှတ်ကာ အားလပ်ရက်သတ်မှတ်ထားပါသည်။ ကရင်နှစ်သစ်ကူးနေ့ကိုလည်း အားလပ်ရက်အဖြစ်သတ်မှတ်ထားပါသည်။ အခြားသော ကချင်၊ ကယား၊ ချင်း စသည့် တိုင်းရင်းသားများ၏ နှစ်သစ်ကူးနေ့များကို အားလပ်ရက်အဖြစ်သတ်မှတ်နိုင်လျှင် အလွန်ပင် ပျော်ရွှင်ဖွယ် ကောင်းမည်ဖြစ်ပါသည်။

ဒီဇင်ဘာ ၂၅ ရက်နေ့မှာ ခရစ်စမတ်နေ့ဖြစ်ပါသည်။ ကမ္ဘာ့နိုင်ငံ အများစုတွင် အားလပ်ရက်ဖြစ်သကဲ့သို့ မြန်မာနိုင်ငံတွင်လည်း အလွတ်ပေး၍ မဖြစ်ပါ။ အားလပ်ရက်သတ်မှတ်ရပါမည်။ ခရစ်ယာန်ဘာသာဝင်တို့၏ ခရစ်စမတ်နေ့ကို အားလပ်ရက်သတ်မှတ်သကဲ့သို့၊ အစ္စလာမ်ဘာသာဝင်တို့၏ အစ် (Eid) နေ့ကိုလည်း အားလပ်ရက်သတ်မှတ်ထားပါသည်။ ထိုမျှသာမက ဟိန္ဒူဘာသာဝင်တို့၏ ဒီပါဝါလီ (Depavali) နေ့ မှာလည်း မြန်မာနိုင်ငံ၌ အားလပ်ရက်ဖြစ်ပါသည်။

ထို့ကြောင့် နိဂုံးချုပ်အနေဖြင့် ထပ်မံပြောကြားရပါလျှင် ကျွန်ုပ်တို့ မြန်မာနိုင်ငံ၌ အားလပ်ရက် အမြောက်အမြားရှိနေခြင်းကို အထူးပင် ဂုဏ်ယူမိပါသည်။ ။


အထက်ပါ စာစီစာကုံးတွင် ဖောချက်များ ပါဝင်ပါသည်။ အဲလေ ယောင်လို့။ အပေါ်ကရေးထားတဲ့ထဲမှာ နည်းနည်း ဖောထားမိပါတယ်။ အထောက်အထားတွေ အကိုးအကားတွေကလည်း ရှာရမှာပျင်းတာနဲ့ သိသလောက်မှတ်သလောက် ရေးလိုက်တယ်။ အဲဒီတော့ ကျွန်တော့်ရဲ့
ဖောချက်များကို သိရှိတဲ့သူများက ပြင်ပေးသွားကြပါလို့ ပြောချင်ပါတယ်။

ဖောချက်တွေကတော့
နံပါတ်တစ်၊ မြန်မာပြက္ခဒိန်မသုံးပဲ အပြည်ပြည်ဆိုင်ရာ ပြက္ခဒိန်သုံးပြီး သင်္ကြန်စကျသောနှစ်။
နံပါတ်နှစ် သင်္ကြန် ၁၀ ရက် စပိတ်သောနှစ်။
နံပါတ်သုံး ဗုဒ္ဓဘာသာကို နိုင်ငံတော်ဘာသာအဖြစ် တရားဝင်သတ်မှတ်ထားသလား မထားဘူးလားမသိပါ။
နံပါတ်လေး ကရင်နှစ်သစ်ကူးနေ့ကို ထူးထူးခြားခြား ပိတ်ရက်လုပ်ထားလေတော့ သူတို့က သီးသန့်ပြက္ခဒိန်ရှိတယ်ပေါ့ ??? ကျန်တဲ့တိုင်းရင်းသားတွေ

ပြက္ခဒိန်သီးသန့်မရှိကြလေရော့သလား ???။
နံပါတ်ငါး ဘာများကျန်ဦးမလဲမသိ။

နောက်တစ်ခုက၊ အရွဲ့တိုက်ချက်လို့ပြောရမလားပဲ၊ ပိတ်ရက် အားလုံးပေါင်း ၂၅ ရက်တောင်ပိတ်ရက် ရှိတယ်။ တစ်လ နီးပါးပါပဲ။
စာစီစာကုံးထဲမှာတော့ အားလပ်ရက်များတာကို အရမ်းဂုဏ်ယူပြထားတယ်။ ဟင်းဟင်း။
အဲဒီတော့ မြန်မာပြည်ကလူတွေ တစ်လလောက်အလုပ်မလုပ်ပဲ ထိုင်နေလို့ မတိုးတက်တာလို့ တစ်ခါတစ်လေ တွေးမိသေးတယ်။ ဆိုင်သလား မဆိုင်လား တော့မသိ ... ခွိခွိခွိ။

ကဲ ... နိချုံးဂုတ်ဖို့လည်းတန်ပြီမို့ ဒီစာရေးဖြစ်တဲ့ အကြောင်းကိုပဲ ပြန်ပြီးကောက်ရလျှင်ဖြင့်၊ သူများနိုင်ငံတွေဆို မေလ ၁ ရက်နေ့က တနင်္ဂနွေနေ့ကျနေရင် တနင်္လာနေ့ကို အစားပြန်ပိတ်ပေးတာမျိုးရှိရဲ့။ မြန်မာနိုင်ငံမှာတော့ ပိတ်ရက်များလွန်းနေလို့ပဲ မပိတ်တာလား၊ တနင်္လာနေ့မှာ အစားပြန်ပိတ်ပေးပါလို့ မတောင်းဆိုကြလို့ မပိတ်တာလား၊ မြန်မာပြည်က အလုပ်သမားတွေက အလုပ်အရမ်းကြိုးစားချင်ကြတာလား၊ လား၊ လား၊ လား။ အဖြေကို ပဠေဟိ လုပ်လိုက်မယ်။ ပြည်ကုံးဖားချ။ ဒိန်း။

ခက်ဆစ်။ ။
ဖော (ဗန်းစကား) = အဓိပ္ပါယ်သေချာမသိပဲ (သို့) အကြောင်းအရာတစ်ခုကို အတိအကျမသိပဲ ခပ်တည်တည်ဖြင့်ပြောဆိုခြင်း
နိချံုးဂုတ် (စကားလိမ်) = နိဂုံးချုပ်
ပဠေဟိ (စကားလိမ်) = ပဟေဠိ
ပြည်ကုံးဖား = ပြည်ဖုံးကား
ဒိန်း = ပြည်ဖုံးကားပြုတ်ကျ၍ မြည်သံ