သိပ်ချစ်ရသော သူ့အကြောင်း

သိပ်ချစ်ရသော သူ့အကြောင်း

ဒီမနက်အိပ်ရာနိုးတော့ နေမကောင်းဖြစ်တယ်။ ဆရာဝန်ဆီတော့ သွားမပြတော့ပါဘူး။
မနက်၊ နေ့လည်၊ ညနေ ပါရာစီတမော့ သုံးလုံးသောက်လိုက်တယ်။
နေမကောင်းဖြစ်နေတဲ့အချိန်တွင်းမှာပဲ ဘယ်လိုဖြစ်တယ်တော့မသိပါဘူး
သူ့ကိုသတိရမိတယ်။ အဲဒါနဲ့ သူ့အကြောင်း ဘလော့ ရေးချင်လာတယ်။ ပြောရရင်
သူ့ကိုချစ်တဲ့အကြောင်းတွေကိုပဲ ရေးချင်မိတယ်။ ချက်ခြင်းဆိုသလိုပဲ
ရေးဖြစ်ပါတယ်။ ဒီတစ်ခေါက်တော့ ပို့စ-မော်ဒန် စတိုင်နဲ့ရေးလိုက်ပါတယ်။
ဟဲဟဲ။

*****

သူအကြောင်းကို စပြောရလျှင် သူ့ကိုကျွန်တော် အရမ်းချစ်ပါသည်ဟု
စပြောရပါမည်။ သိုသော် သူနှင့် ကျွန်တော်သည် ချစ်သူများ မဟုတ်ကြပါ၊
မဖြစ်ကြပါ။ သူ၏ သူငယ်ချင်းဖြစ်သော ကျွန်တော့်၏ တပည့်တစ်ယောက်က
မိတ်ဆက်ပေးသဖြင့် သူနှင့်စသိရပါသည်။ ထိုစဉ်က ကျွန်တော့်အသက် ၂၆
နှစ်ခန့်ဖြစ်ပါသည်။ သူသည် အသားညိုညို မျက်နှာသွယ်သွယ်နှင့် ဖြစ်ပါသည်။
အရမ်းချော အရမ်းလှ သည်ဟုမပြောနိုင်သော်လည်း အလွန်ပြေပြစ်ပြီး
ကြည့်ကောင်းသည်ဟုဆိုရပါမည်။ သူ့အကြောင်းပြောလျှင် ထည့်ပြောသင့်သည့်
အချက်တစ်မှာ နှစ်လိုဖွယ်အပြုံးကို ပိုင်ဆိုင်သောမိန်းကလေးတစ်ယောက်
ဖြစ်သည်ဟု ပြောရမည်ဖြစ်ပါသည်။ သူနှင့် ပထမဆုံးအကြိမ်
စကားစပြောပြောခြင်းတွင်ပင် သူ၏ ချစ်စရာကောင်းလှသောအပြုံးကို
ကျွန်တော်မြင်ခွင့်ရပါသည်။ ထိုအပြုံးတစ်ခုတည်းကြောင့်
သူ့ကိုချစ်မိသည်မဟုတ်ပါ။ သူနှင့်ပတ်သက်လျှင် အရာရာသည်
ကဗျာဆန်၍လှနေတတ်ပါသည်။

သူ၏ မျက်နှာသွင်ပြင်မှာ အေးဆေးတည်ငြိမ်သည်ဟု ဆိုရပါမည်။
သူ့ကိုယ်သူယုံကြည်မှု အပြည့်ရှိနေပုံလည်းရပါသည်။ ကျွန်တော်စကားပြောသည့်
အလှည့်များတွင် သူက အပြံုးတဝက်ဖြင့် စိတ်ပါဝင်စားစွာ
နားထောင်ပေးတတ်ပါသည်။ ဟန်ဆောင်ပြုံးများစွာကို
ကျွန်တော်တွေ့ဖူးခဲ့ပါသည်။ သို့သော် သူ၏အပြုံးများသည် အမှန်တကယ်
လှိုက်လှဲဖော်ရွေသော အပြံုးများဖြစ်ကြပါသည်။ သူ၏အပြုံးများအတွက်
"လှိုက်လှဲဖော်ရွေ" ဆိုသော ဝေါဟာရအပြင် မည်သည့်ဝေါဟာရအား သုံးနှုံးရမည်ကို
မသိတော့ပါ။ သူ၏ စိတ်သဘောမှာလည်း ရိုးသားဖြူစင်ရမည်ဟု
ကျွန်တော်ယုံကြည်ပါသည်။ ကျွန်တော်မယုံကြည်လျှင်လည်း သူ၏ စိတ်သဘောထားမှာ
ရိုးသားဖြူစင်သည်သာ ဖြစ်ပါလိမ့်မည်။ ထို့ကြောင့် သူ့ကို
ချစ််သည်ဟုဆိုခြင်းထက်ပို၍ လေးစားတန်ဖိုးထားမိပါသည်။

မြန်မာမိန်းကလေးများထဲမှ တစ်ယောက်ဖြစ်သောသူ့ကို မြန်မာတစ်ယောက်အမြင်၌ ပု၊
ရှည်၊ ပိန်၊ ဝ စသော နာမဝိသေသနများတပ်၍ ရနိုင်မည်မဟုတ်ပါ။ ပုသည်လည်း
မဟုတ်၊ ရှည်သည်လည်း မဟုတ်၊ ဝသည်ဟုလည်း မဆိုနိုင်၊ ပိန်သည်ဟုလည်း
မပြောနိုင်ပေ။ မိန်းကလေးများ အဝတ်အစားဝတ်သည်နှင့် ပတ်သက်၍
မည်သို့ဝတ်ဆင်ထားသည်ဖြစ်စေ ကျွန်တော်သည် မည်သို့မျှမှတ်ချက်ပေးမည်
မဟုတ်ပါ။ သို့သော် သူသည် ခောတ်လည်းမဆန်လွန်း ရိုးလည်းမရိုးလွန်း သော
အဝတ်အစားများကို ဝတ်ဆင်ထားသည်ဟုပြောချင်ပါသည်။ စတိုင်ကျသည်ဟု ဆိုလိုပါက
ဆိုနိုင်မည်လည်းဖြစ်ပါသည်။

ကြည်လင်တောက်ပသော မျက်လုံးများကိုလည်း သူသည် ပိုင်ဆိုင်၏။
စုစည်းထားခြင်းမရှိသည့် သူ၏ဆံပင်များမှာ ပုခုံးအောက် ကျရောက်သည်အထိ ရှိ၏။
ဆံပင်ကောက် ဆံပင်နွယ်များမှာ မိန်းမပိုဆန်စေသည်။ ထို့ထက်ပို၍
ဆိုနိုင်သည်မှာ ဂန္ထဝင်ဆန်သည်။ သူ၏နဂိုဆံပင်သည်လည်း ကောက်ပုံရသည်။
ဆံပင်အရောင်မှာ နက်မှောင်၍မနေ၊ နီညိုရောင်မဆိုစလောက်လေး သမ်းသည်။
ထိုသည်ကိုပင် ကျွန်တော် သဘောကျသည်။

စကားပြောရာတွင်တော့ သူသည် သွက်သွက်လက်လက်ရှိပါသည်။ သူ၏
စကားလုံးအသုံးအနှုံး နှင့် လေယူလေသိမ်းတို့မှာ ရန်ကုန်သူ/သားတို့၏
အသုံးအနှုံးမျိုး လေယူလေသိမ်းမျိုးဖြစ်၏။ ပညာတတ်အသိုင်းအဝိုင်းမှလည်း
ဖြစ်ပုံရပါသည်။ ယဉ်ကျေးချိုသာစွာ ပြောဆိုတတ်သော မိန်းကလေးတစ်ဦးဟုလည်း
သတ်မှတ်၍ ရပါသည်။ ထိုသို့ ပထမဦးဆုံးအကြိမ် သူနှင့်တွေ့ရသည်တွင်ပင်
သူ့ကို မြတ်နိုးမိပါသည်။

*****

သူနှင့်တွေ့ပြီး နှစ်ရက်သုံးရက်လောက်အကြာမှာ သူ့ဆီကိုဖုန်းဆက်သည်။ သူက
သူ့အိမ်လိပ်စာပြောပြသည်။ သူ့အိမ်ကို လာဖို့ခေါ်သည်။ ကျွန်တော်သွားသည်။
သူ့အိမ်ကိုသွား၍ သူ့ကိုသွားတွေ့ရသည်မှာ အနည်းငယ်မက စိတ်လှုပ်ရှားရသည်ဟု
ကျွန်တော်ဝန်ခံရပါမည်။ ဆိတ်ငြိမ်ရပ်ကွက်တစ်ခု၌ဖြစ်၏။
လုံးချင်းအိမ်နှင့်ခြံဝန်းများဖြစ်၏။ ခြံစောင့် သို့မဟုတ် ဒရိုင်ဘာ
ဖြစ်ဟန်တူသောလူတစ်ယောက်က ခြံတံခါးလာဖွင့်ပေးသည်။
ဧည့်ခန်းထဲတွင်သူနှင့်တွေ၏။ ခဏအကြာတွင် အအေးနှင့် မုန့်အချို့
ကျွန်တော့်ရှေ့သို့ရောက်လာ၏။ သူ၏အမေနှင့်လည်း တွေ့ရပြီး
စကားအနည်းငယ်ပြောဖြစ်၏။ ကျွန်တော် စိတ်မကျဉ်းကျပ်ရအောင်
သက်သောင့်သက်သာဖြစ်အောင် စကားပြောပေးခြင်းဖြစ်ကြောင်း နားလည်လိုက်မိ၏။
ထို့သို့ဖြစ်အောင် ပြောတတ်သော သူ၏အမေကိုလည်း စိတ်ထဲမှချီးကျူးမိ၏။
သူ၏အမေမှာ ရိုးရိုးအဆင့်ထက်ပိုသော ဆရာဝန်တစ်ဦးဖြစ်မည်ဟု ခန့်မှန်းမိသည်။

ထို့နောက် သူ၏ စားပွဲတင်ကွန်ပျူတာအား ကျွန်တော့်ကိုပြသည်။ ကွန်ပျူတာ၏
ဒက်စတော့ ဘက်ဂရောင်း မှ ပုံကိုမြင်ရသောအခါ၊ သူသည် အင်္ဂလိပ် ပရီးမီးယားလိဂ်
ပရိတ်သတ်တစ်ဦးဖြစ်မှန်း သိရတော့၏။ သူအားပေးသော အသင်းမှာ တစ်သင်း၊
ကျွန်တော်အားပေးသောအသင်းမှာ အခြားတစ်သင်း ဖြစ်၏ ။ မတူကြပါ။ သို့သော်
ကိစ္စမရှိ၊ ကျွန်တော်တို့နှစ်ဦးအကြားတွင် ပြောစရာအကြောင်းအရာတစ်ခု
ရသွားခြင်းဖြစ်ပါသည်။ ကျွန်တော် ပြန်သောအခါ သူက ခြံဝအထိလိုက်ပို့၍
နှုတ်ဆက်သည်။ သူ့အပြံုးကို မှတ်မိသထက်မှတ်မိအောင် သေချာကြည့်ခဲ့ပြီး
ကျွန်တော်လည်း ပြံုးပြနှုတ်ဆက်ခဲ့သည်။

*****

ထို့နောက်ပိုင်းတွင် သူနှင့်မတွေ့ဖြစ်၊
တွေ့အောင်းလည်းမကြိုးစားဖြစ်ခဲ့ပါ။ ဂျီတော့တွင်တော့ တစ်ခါတစ်ရံ သူနှင့်
စကားပြောဖြစ်သည်။ ဂျီးတော့ထဲတွင် သူသည် အင်္ဂလိပ်လိုသာပြောသည်။ သူ၏
အင်္ဂလိပ်စာမှာ အတော်ကောင်းသည်။ ထိုအချက်ကြောင့်လည်း
သူ့ကိုအထင်ကြီးမိပြန်သည်။ တစ်ခါတေလေကျတော့လည်း သူ့ကို
အွန်လိုင်းဖြစ်နေတာတွေ့သည်။ ဘာကြောင့်မှန်းမသိ သူကို စပြီးစကားမပြောဖြစ်၊
သူကလည်းမပြော။ ထူးဆန်းသည်ဟုဆိုရမလား မထူးဆန်းဘူးလို့ဆိုရမလား မပြောတတ်
သူ့ကိုကျွန်တော် အရမ်းချစ်သည်။ သို့သော် သူ့ကိုချစ်သည့်အကြောင်း
ဖွင့်ပြောဖို့ မကြိုးစားဖြစ်၊ ရင်းနှီးမှုပိုရအောင်လည်း
မကြိုးစားဖြစ်ခဲ့ပါ။ ဘာကြောင့်မှန်းမသိဆိုသော အဖြေကိုထွက်အောင်လည်း
ကျွန်တော်ကိုယ်တိုင် အဆုံးအထိမစဉ်းစားဖြစ်ပါ။

သူနိုင်ငံခြားသို့ ပညာသင်သွားသည်ဟုသိရသည်။ နောက်ထပ်
နှစ်နှစ်လောက်ကြာသောအခါတွင်တော့ သူစေ့စပ်ကြောင်းလမ်းသော သတင်းကို
အွန်လိုင်းစတေးတပ် တစ်နေရာတွင်တွေ့ရသည်။ စိတ်ထဲတွင်တစ်မျိုးတော့ဖြစ်မိ၏။
သို့သော် သူနှင့်တော့ ဘာမှမပြောဖြစ်။

သူနှင့်တစ်ကြိမ် မမျှော်လင့်ပဲ ဆုံမိပါသည်။ လေဆိပ်တွင်ဖြစ်သည်၊
ကျွန်တော့်သူငယ်ချင်းတစ်ယောက်ကို သွားကြိုတာဖြစ်ပါသည်။ သူကလည်း
သူ့သူငယ်ချင်းတွေနှင့်ပဲ ဖြစ်ပါသည်။ သူတို့လည်း သူတို့သူငယ်ချင်းကို
လာကြိုကြတာပဲဖြစ်ပါသည်။ သူ၏အပြုံးလှလှလေးများကို တွေ့သည်မှာ
အလွန်ပျော်ဖို့ကောင်းပါသည်။ စကား လေးငါးခြောက်ခွန်းသာ ပြောဖြစ်လိုက်၏။
သူငယ်ချင်းတွေလည်း ပါနေသဖြင့် နှုတ်ဆက်ပြီး ပြန်ခဲ့လိုက်သည်။ ထိုသည်မှာ
သူနှင့်နောက်ဆုံးတွေ့ဖြစ်ခဲ့သော အချိန်ဖြစ်ပါသည်။

တစ်ခါတစ်ရံ သူ့အကြောင်းစဉ်းစားမိသည်။ စဉ်းစားမိလိုက်တိုင်း သိမ်မွေ့သော၊
နူးညံ့သော ရင်ခုန်သံတို့ကို ကျွန်တော်ပြန်ကြားနေရတတ်သည်။
သူသည်ကျွန်တော့်အတွက်တော့ နတ်သမီးတစ်ပါးဖြစ်တော့၏။ ။

*****

စရေးတုန်းကတော့ ပို့စ-မော်ဒန် စတိုင်ဖြစ်အောင်ရေးတာပါပဲ။ ဒါပေမယ့်
ရေးရင်းရေးရင်းနဲ့ မု တစ်ခုဝင်လာသလိုလို ရှိတာနဲ့ အဲဒီ မု
အတိုင်းပဲဆက်ရေးလိုက်တယ်။ ပို့စ-မော်ဒန် ဖြစ်လားမဖြစ်လားလဲ မသိတော့ဘူး။
:P

*****

တမင်တကာ ချန်ထားခဲ့တဲ့ စာကြွင်း။ ။
နတ်သမီးနဲ့ လူနဲ့ ချစ်လို့မဖြစ်နိုင်ဘူးလေ ...


ခက်ဆစ်။ ။
ပါရာစီတမော့ (အင်္ဂလိပ်) = paracetamol
ပို့စ-မော်ဒန် (အင်္ဂလိပ်) = post modern
စတိုင် (အင်္ဂလိပ်) = style
ဒရိုင်ဘာ (အင်္ဂလိပ်) = driver
ဒက်စတော့ (အင်္ဂလိပ်) = desktop
ဘက်ဂရောင်း (အင်္ဂလိပ်) = background
ပရီးမီးယားလိဂ် (အင်္ဂလိပ်) = Premier League
ဂျီတော့ (အင်္ဂလိပ်) = Gtalk
အွန်လိုင်း (အင်္ဂလိပ်) = online
အွန်လိုင်း စတေးတပ် (အင်္ဂလိပ်) = online status
မု (အင်္ဂလိပ်) = mood